1. Inuit isertitaat

Kapitalimi uani inuit isertitaat pillugit paasissutissat takuneqarsinnaapput. Immikkoortut tallimanngorlugit agguarneqarpoq, tassani isertitat assigiinngissusaat erseqqissarneqarput, najugaqarfinni aammalu inuttut qanoq inissisimaneq tunngavigalugit  agguataarneri allaatigineqarluni. Immikkoortumi 1.1-imi ersersinneqarpoq kommunini isertitat, kommunini isertitat allaffissornikkut atorneqarsinnaapput aamma nunami sumiissusersuinerni ilaatigut atorneqarsinnaallutik.

Tulliullugulu immikkoortumi 1.2-mi erseqqissarneqarpoq immikkoortortaqarfinni isertitat, tassani sumiiffiit qitiutinneqarput. Immikkoortumi 1.3-mi illoqarfinni nunaqarfinnilu isertitat misissorneqarput immikkoortumilu 1.4-mi erseqqissarneqarluni arnat angutillu isertitaasa immikkoortinnerat. Immikkoortumi 1.5-imi  isertitat nalunaarsornerat ilinniarnerup qaffasissusaanut agguarneqasimasut takutinneqarput.

 

Inuit isertitaannut tunngasut paasissutissat sukumiinerusut kapitali 5- imi immikkoortoq 5.1-imi aamma kisitsisaataasivimmi bank.stat.gl-imi takuneqarsinnaapput, kisitsisaataasivimmi kisitsisit pisariaqartitat tunngavigalugit paasissutissanik assigiinngitsunik aallertoqarsinnaavoq, soorlu makkununnga tunngasunik; ukioqqortussuseq, suiaassuseq, najugaqarfik, inunngorfik ilinniarsimassuserlu.

 

1.1 Kommunini isertitat

 

Tabeli 1.1 2016-imi inuit isertitaat agguaqatigiissillugit (1.000 kr.)

	Akileraarutita-qanngitsumik isertitat	Isertitat akileraaru-taasussat	Isertitat akileraaruse-riikkat agguaqati-giissillugit
Nuna tamakkerlugu..........................	240	224	163
Kommune Kujalleq ...........................	192	178	134
Kommuneqarfik Sermersooq ....................	282	264	190
Qeqqata Kommunia ..........................	240	225	164
Qaasuitsup Kommunia ........................	202	188	138

 

Najoqqutaq:  http://bank.stat.gl/INDP1

 

Nunatsinni kommunini sisamaasuni Kommuneqarfik Sermersuumi inuit isertitaat agguaqatigiissillugit annertunerpaapput. Qeqqata Kommuniani isertitat qaffasissusaat nuna tamakkerlugu agguaqatigiissinneratut inissisimapput, isertitallu Qaasuitsup Kommuniani aamma Kommune Kujallermi nuna tamakkerlugu agguaqatigiissitsinermit 15 pct.-it missaanik appasinnerullutik aamma 20 pct.-it ataallugit appasinnerusumik inissisimallutik, taakku isertitanut immikkoorsitsinerni pingasuuni sanilliussinermut atorneqartuni tamani taamatut inissisimapput.

 

Tabeli 1.2 2012-miit 2016-imut agguaqatigiissillugit ilanngaateqanngitsumik isertitat

	2012	2013	2014	2015	2016	Allannguut 2015-2016
	1.000 kr.					Pct.
Nuna tamakkerlugu........	213	217	218	229	240	4,8
Kommune Kujalleq .........	173	178	176	187	192	2,9
Kommuneqarfik Sermersooq ..	259	265	262	275	282	2,6
Qeqqata Kommunia ........	207	209	215	226	240	5,9
Qaasuitsup Kommunia ......	173	176	181	186	202	8,5

 

Najoqqutaq:  http://bank.stat.gl/INDP1

 

2016-imi ilanngaateqanngitsumik isertitat agguaqatigiissillugit 11.000 kr.-it missiliorlugit annertuseriarput tassa 4,8 pct.-inik 2015-imut sanilliullugu annertuseriarsimapput. Kommunini tamani sisamaasuni isertitat qaffariaateqarput, kisianni takuneqarsinnaavoq tabelimi 1.2-mi isertitat qaffariaataat Qaasuitsup kommuniani annerpaasut, tassani innuttaasut isertitaat agguaqatigiissillugit 8,5 pct.-imik qaffariaateqarsimapput. Aamma Qeqqata Kommuniani isertitat 6 pct.-inik qaffariaateqarsimapput, kommunini sinneruttuni marlunni najugaqartut isertitaat annikinnerusumik qaffariaateqarsimapput.

 

1.2 Immikkoortortaqarfinni isertitat

Siornatigut kommuniusimasut agguataarneri malillugit isertitat tassaapput immikkoortortaqarfinni isertitat, titartakkami 1.1-imi takuneqarsinnaapput immikkoortortaqarfimmi Nuummi immikkoortortaqarfinnit allaniit isertitat agguaqatigiissillugit qaffasinnerusut. 2016-imi immikkoortortaqarfimmi Nuummi isertitat agguaqatigiissillugit 312.000 kr.-iupput, Sisimiunut sanilliullugu 25 pct.-it angullugit qaffasinneruvoq, Sisimiuni isertitat immikkoortortaqarfinni isertitat qaffasinnerpaat tullerivaat. Immikkoortortaqarfiit sinnerini isertitat agguaqatigiissillugit nuna tamakkerlugu agguaqatigiissinnerat ataappaat.

 

Titartagaq 1.1 2016-imi immikkoortortaqarfinni agguaqatigiissillugit ilanngaateqanngitsumik isertitat

Najoqqutaq:  http://bank.stat.gl/INDP2

 

Immikkoortortaqarfimmi Ilulissani innuttaasut isertitaat qaffariaateqarnerpaajusimavoq, inuit isertitaat agguaqatigiissillugit 23.500 kr.-inik ukioq kingullermut sanilliullugu annertuseriarsimavoq, tassa isertitat 10,9 pct.-inik qaffariarsimapput. Qaasuitsup Kommuniata immikkoortortaqarfiani allani taamatut aamma annertuumik qaffariaateqarput, tassa 8 pct.-it sinnerlugit isertitat qaffariaateqarsimagamik. 2016-imi isertitat Nuummi qaffasinnerpaapput, tassani agguaqatigiissillugit ilanngaateqanngitsumik isertitat 312.000 kr.-iupput.

Immikkoortortaqarfinni pingasuni agguaqatigiissillugu isertitat annikitsumik appariarsimapput. Immikkoortortaqarfimmi Qaanaami isertitat qaffasissusaa appasinnerpaareeraluartoq 1,4 pct.-nik appariaateqarpoq, 2016-imi immikkoortortaqarfimmi tassani agguaqatigiissillugit ilanngaateqanngitsumik isertitat 137.000 kr.-iupput.

 

Tabeli 1.3 2012-imiit 2016-imut immikkoortortaqarfinni agguaqatigiissillugit ilanngaateqanngitsumik isertitat

	2012	2013	2014	2015	2016	Allannguut 2015-2016
	1.000 kr.					Pct.
Nuna tamakkerlugu	213	217	218	229	240	4,8
Nanortalik .........	145	144	145	152	160	5,4
Qaqortoq .........	189	197	194	209	216	3,2
Narsaq ...........	173	176	175	182	182	-0,3
Paamiut ..........	173	171	171	176	177	0,5
Nuuk ............	287	292	290	305	312	2,4
Maniitsoq .........	186	181	189	205	220	7,7
Sisimiut ..........	218	223	228	238	250	5,1
Kangaatsiaq ......	122	137	140	141	153	8,3
Aasiaat ..........	174	172	176	182	193	5,9
Qasigiannguit ......	171	182	181	187	202	8,5
Ilulissat ...........	204	205	210	214	238	10,9
Qeqertarsuaq ......	186	189	186	196	206	5,0
Uummannaq ......	174	181	184	197	214	8,4
Upernavik .........	149	148	158	159	173	8,8
Qaanaaq .........	125	127	137	139	137	-1,4
Tasiilaq ..........	148	160	152	155	162	5,0
Ittoqqortoormiit .....	164	157	168	182	180	-0,8

 

Najoqqutaq:  http://bank.stat.gl/INDP2

 

Titartagaq 1.2 Titartagaq 1.2 2015-imiit 2016-imut agguaqatigiissillugit ilanngaateqanngitsumik isertitat qaffakkiartornerat

Najoqqutaq:  http://bank.stat.gl/INDP2

 

1.3 Illoqarfini nunaqarfinnilu isertitat

Titartakkami 1.3-mi nunaqarfinni isertitat illoqarfinni isertitanit appasinnerusoq takuneqarsinnaavoq. Nunami tamarmi illoqarfinni najugallit agguaqatigiissillugit 249.000 kr.-inik isertitaqarput nunaqarfinnilu najugallit 178.000 kr.-inik isertitaqarlutik. Titartakkami, kommunini sisamaasuni illoqarfinni nunaqarfinnilu isertitat nikingassutaat, takuneqarsinnaavoq. Assigiinngissuseq annerpaaq Kommuneqarfimmi Sermersuumiippoq, Kommuneqarfimmi Sermersuummi illoqarfinni najugallit agguaqatigiissillugit isertitaat nunaqarfinni najugaqartuniit isertitaat marloriaammik annertuneruvoq. Kommunimi sumiissutsit tamarmik taamatut inissisimapput. Illoqarfinni innuttaasut amerlanerpaat Nuummi najugaqarput, Nuummi isertitat qaffasinnerpaajupput, nunaqarfinnilu innuttaasut amerlanerpaat Tasiilap immikkoortortaqarfianiillutik, tassani agguaqatigiissillugit isertat appasinerpaamiinnerat ilisarnaataavoq.

 

Qeqqata kommuniani illoqarfinni nunaqarfinnilu agguaqatigiissillugit isertitat assigiingajalluinnarput, tassani Kangerlussuarmi isertitat qaffasinnerat peqqutaavoq. Nunaqarfik mittarfeqarfik kommunimi nunaqarfinni najugaqartut 40 pct.-eringajalluinnagaaanik inuttaqarpoq, kommunimi agguaqatigiissillugit isertitani tamanna nunaqarfinni naatsorsuutini sunniuteqarluarpoq. Narsarsuarmi isertitat aamma qaffasittumi inissisimapput, tamanna aamma Kommune Kujalliup nunaqarfiisa isertitarisaanut sunniuteqarluarpoq – kisianni Kangerlussuarmut assingoqqissaanngilaq, Kommune Kujallermi nunaqarfinni najugaqartuni agguaqatigiissitsinermi Narsarsuarmi najugaqartut amerlarujussuannginnerat pissutaalluni.

 

Titartagaq 1.3 2016-imi illoqarfinni nunaqarfinnilu agguaqatigiissillugit ilanngaateqanngitsumik isertitat

Najoqqutaq:  http://bank.stat.gl/INDP1

 

Titartakkap 1.4-ip takutippaa nunaqarfinni illoqarfinnilu ukioqqortussutsit apeqqutaatillugit isertitat, inuit sulisinnaasut illoqarfinni nunaqarfinnilu najugaqartut isertitaat nikingasorujussuusoq takuneqarsinnaavoq. Nunaqarfinni isertitat inuit ukiui apeqqutaatinnagit assigiiaarnerunerat nalinginnaasumillu illoqarfinni utoqqarnut meeqqanullu sanilliullugu sulisinnaasut akornanni isertitat qaffasinnerunerat, tassani peqqutaapput.

 

Titartagaq 1.4 2016-imi ukioqqortussuseq najugaqarfinnullu agguarlugit agguaqatigiissillugit ilanngaateqanngitsumik isertitat

Najoqqutaq:  http://bank.stat.gl/INDP1

 

Illoqarfinni agguaqatigiissillugu isertitat misissorlugit maluginiagassaavoq, illoqarfinni agguaqatigiissillugu isertitat assigiinngisitaarneri. Tabeli 1.4-mi takuneqarsinnaavoq Nuummi isertitat agguaqatigiissillugit 315.000 kr.-iusut illoqarfinni allaniit qaffasinnerpaalluni. Sisimiuni isertitat qaffasissusaat qaffasinnerpaap tulliattut inissisimapput agguaqatigiissillugu 246.000 kr.-iullutik. Nuna tamakkerlugu illoqarfinni agguaqatigiissillugu isertitat 249.000 kr.-iusut illoqarfiit akornanni taamaallaat Nuummi isertitanit qaangerneqarsimavoq.

 

Tabeli 1.4. Illoqarfinni agguaqatigiissillugit ilanngaateqanngitsumik isertitat

	2014	2015	2016
Nanortalik ..............................	155	163	174
Qaqortoq ...............................	198	214	221
Narsaq .................................	165	175	173
Paamiut ................................	171	176	176
Nuuk ..................................	292	307	315
Maniitsoq ...............................	199	213	230
Sisimiut ................................	224	234	246
Kangaatsiaq ............................	149	156	163
Aasiaat ................................	178	183	192
Qasigiannguit ...........................	183	187	203
Ilulissat ................................	213	217	239
Qeqertarsuaq ...........................	187	196	206
Uummannaq ............................	195	205	217
Upernavik ..............................	186	189	197
Qaanaaq ...............................	144	147	143
Tasiilaq ................................	166	169	179
Ittoqqortoormiit.........................	164	180	177

 

Najoqqutaq:  http://bank.stat.gl/INDP3

 

Mittarfeqarfinni Kangerlussuarmi Narsarsuarmilu isertitat nunaqarfinnut allanut sanilliullugit qaffasinnerunerat malunnarpoq. 2015-imiit 2016-imut maluginiarneqarsinnaavoq tabeli 1.5-mi, nunaqarfiit sinneri arfineq pingasut qaffasinnerpaamik agguaqatigiissillugit isertitallit tamarmik Qaasuitsup Kommunianiittut, nunaqarfiit taakku tamarmik ersarissumik isertitaat qaffasinnerupput.

 

Tabeli 1.5. 2016-imi nunaqarfiit agguaqatigiissillugit annerpaamik isertitaqarfiusut (1.000 kr.)

		2014	2015	2016
	Kangerlussuaq (Immikkoortortaqarfik Sisimiut)..	315	318	316
	Narsarsuaq (Immikkoortortaqarfik Narsaq).....	279	299	293
	Saattut (Immikkoortortaqarfik Uummannaq)...	198	206	255
	Innaarsuit (Immikkoortortaqarfik Upernavik)....	246	210	250
	Saqqaq (Imikkoortortaqarfik Ilulissat).........	181	191	244
	Illorsuit (Immikkoortortaqarfik Uummannaq)...	175	185	238
	Qeqertaq (Immikkoortortaqarfik Ilulissat)......	184	173	230
	Nutaarmiut (Immikkoortortaqarfik Upernavik)..	152	157	222
	Ukkusissat (Immikkoortortaqarfik Uummannaq).	169	185	215
	Ilimanaq (Immikkoortortaqarfik Ilulissat)......	162	180	215
Najoqqutaq:  http://bank.stat.gl/INDP3

 

Qaanaap eqqaani nunaqarfimmi Qeqertami agguaqatigiissillugit ilanngaateqanngitsumik isertitat 95.000 kr.-iupput, Qaanaap immikkoortortaqarfiini isertitat tamanut sanilliullugit appasinnerpaajupput. Tabeli 1.6-imi listip takutippaa 2016-imi nunaqarfiit quliusut agguaqatigiissillugit ilanngaateqanngitsumik isertitaat appasinnerpaamiittut, tabelillu ersersippaa ilaatigut Qaanaami nunaqarfiit pingasut isertitatut nalunaarutigineqarsimasut akornanni ajorluinnartumik inissisimasut.

 

Tabeli 1.6. 2016-imi nunaqarfiit agguaqatigiissillugit minnerpaamik isertitaqarfiusut (1.000 kr.)

	2014	2015	2016
Qeqertat (Immikkoortortaqarfik Qaanaaq).....	82	77	95
Saarloq (Immikkoortortaqarfik Qaqortoq)......	109	108	104
Aappilattoq (Immikkoortortaqarfik Nanortalik).	106	109	107
Savissivik (Immikkoortortaqarfik Qaanaaq).....	104	100	110
Iginniarfik (Immikkoortortaqarfik Kangaatsiaq).	111	102	112
Siorapaluk (Immikkoortortaqarfik Qaanaaq)....	109	114	112
Eqalugaarsuit (Immikkoortortaqarfik Qaqortoq).	129	127	114
Kuummiut (Immikkoortortaqarfik Tasiilaq).....	129	119	115
Tiilerilaaq (Immikkoortortaqarfik Tasiilaq).....	111	116	116
Nuussuaq (Immikkoortortaqarfik Upernavik)....	115	105	118

Najoqqutaq: http://bank.stat.gl/INDP3

 

1.4 Isertitat suiaassutsimut immikkoortillugit

2016-imi angutit agguaqatigiissillugit ilanngaateqanngitsumik isertitaat 277.000 kr.-iupput, arnallu isertitaat 198.000 kr.-iulluni. Nuna tamakkerlugu angutit isertitaat agguaqatigiissillugit 40 pct.-inik arnat isertitaanniit annertuneruvoq.

Angutit sulisinnaasut, arnanut sulisinnaasunut sanilliullugit amerlanerunerat naatsorsuutini ilanngunneqanngilaq, angutit amerlanerusut sulisinnaasut ukiui isertitaqqortunerpaaffiup nalaaniipput, utoqqaallu akornanni tassa isertitakinnerpaani arnat amerlanerullutik. Taamaattumik ilumoortumik isertitat nikinganerat kisitsisinit ersersinneqartumit appasinneruvoq.

 

Tabeli 1.7 Suiaassutsimut immikkoortillugit agguaqatigiissillugit ilanngaateqanngitsumik isertitat (1.000 kr.)

	2014		2015		2016
	Angutit	Arnat	Angutit	Arnat	Angutit	Arnat
Nuna tamakkerlugu.........	247	187	262	192	277	198
Kommune Kujalleq ..........	187	164	203	168	211	172
Kommuneqarfik Sermersooq ...	299	220	319	226	326	234
Qeqqata Kommunia .........	246	179	264	183	280	193
Qaasuitsup Kommunia .......	201	158	207	163	234	166

 

Najoqqutaq:  http://bank.stat.gl/INDP1

 

Tabeli 1.7-imi takuneqarsinnaavoq kommunini tamani sisamaasuni angutit isertitaat arnat isertitaanniit qaffasinnerusoq. Aammalu titartakkami 1.5-imi takuneqarsinnaavoq angutit isertitaat ukioqqortussuseq naapertorlugu agguataarinermi tamani qaffasinnerpaajusoq, sulisinnaassusillit akornanni nikinganerujussuat tassani takuneqarsinnaavoq. Inuttut qanoq inissisimaneq sumilu najugaqarneq apeqqutaallutik isertitanut suiaassusernullu agguarnerini isertitat nikinganerat titartakkami takuneqarsinnaavoq.

Tabeil 5.2-mi kapitali 5-imi suiaassuseq malillugu isertitat assigiinngitsunik tunuliaqutalersorlugit nalunaarsorneri misissorneqarput, tassannga itinerusumik paasisaqarusuttunut Naatsorsueqqissaartarfiup kisitsisaataasivia bank.stat.gl innersuussutigineqarpoq.

 

Titartagaq 1.5 2016-imi ukioqqortussutsinut suiaassutsinullu immikkoortiterlugit agguaqatigiissillugit ilanngaateqanngitsumik isertitat

Najoqqutaq:  http://bank.stat.gl/INDP1

 

1.5 Isertitat ilinniarnerup qaffasissusaanut agguarlugit

Ilinniarnerup qaffasissusaa isertitallu ataqatigiinneri malunnaateqarput. Inuit ilinniarluarsimasut isertitaat qaffasinneruvoq inunnut appasinnerusumik ilinniarsimasunut sanilliullugit. Ilinniarluarsimasut suliffillit ilinniarluarsimasuunngitsuniit akissarsiaginneruneranik tamanna annerusumik peqquteqarpoq. Ilinniarluarsimasut akornanni suliffeqartut amerlaneruneri taamaasillunilu suliffissaaleqisut ikinneruneri isertitat qaffasinnerinerinut pissutaaqataasut ilagaat. Ilinniarluarsimasut akornanni ikinneroqisut sulinngikkallarnermi pisortanit ikiorsiissutinik pisarput, appasinnerusumik ilinniarsimasut akornanni sulinngikkallarnermi pisortanit ikiorsiissutinit pisartut taakkununnga sanilliullugit amerlanerungaatsiarput.

 

Titartakkami 1.6-imi takuneqarsinnaapput kisitsisit ukioqqortussutsinut eqimattakkuutaanut agguarlugit, ukioqqortussusaat assigiikkaluartut inuit ingerlariaqqiffiusumik ilinniarsimasut agguaqatigiissillugit isertitaat qaffasinnerusut appasinnerusumik ilinniagalinnut sanilliullugit.

 

Titartagaq 1.6 2016-imi agguaqatigiissillugit inuit isertitaat ukioqqortussutsimut aamma qaffasinnerpaamik ilinniakkamut naammassinninnikunut immikkoortillugit

Najoqqutaq:  http://bank.stat.gl/INDP8

 

Tabeli 1.8-mi takuneqarsinnaavoq illoqarfinni nunaqarfinnilu isertitat assigiinngissusaat, ilinniarnerup qaffasissusaa eqqarsaatigalugu isertitat nikinganerat annikinneruvoq. Illoqarfinni nunaqarfinnilu isertitat assigiinngissusaat ilaatigut nassuiarneqarsinnaavoq nalinginnaasumik illoqarfinni ilinniarsimasut qaffasinnerusumik ilinniarsimasuusarnerat.

 

Tabeli 1.8 2016-imi agguaqatigiissillugit inuit isertitaat najugaqarfik, suiaassuseq qaffasinnerpaamillu ilinniakkamut naammassinnissimasunut immikkoortillugit

	Illoqarfik		Nunaqarfik
	Angutit	Arnat	Angutit	Arnat
Tamarmik...................	287	207	209	138
Meeqqat atuarfiat ..............	213	143	195	117
Ilinniarnertuunngorniarfik .........	301	180	274	181
Inuussutissarsiutigalugu ilinniarfik ..	366	254	281	201
Ilinniarnertuunngorniarfimmi ilassutaasumik ilinniartitsinerit .....	231	186	185	286
Ingerlaqqiffiusumik ilinniakkat .....	566	404	376	374

Najoqqutaq:  http://bank.stat.gl/INDP8